Gazteria

Pop-rockaren hastapenak berrituz Supercremalleras taldeak “Gominolas», haien azken singlea aurkeztu du

Sarrera guztiak saldu ostean, Zelaietako kontzertu gelako oholtzara igo ziren Supercremalleraseko taldekideak. Punk ukitua duten pop-rock itsaskorrez beteriko kantak jo zituzten. Haien azken singleak entzuteko aukera izan genuen eta horrez gain, publikatu gabe dituzten hainbat kanta eta bertsio batzuk ere. Duda barik, zeresana emango duen taldea da.

Gernikarren hasierak gogora ekarriz, Gorka Etxeberriak (ahotsa eta gitarra) eta Daniel Westek (gitarra) beti izan dute talde bat sortzeko gogoa, eta 2019an pausoa ematera ausartu ziren. Orduan aurkitu zituzten Unai Markina (bateria) eta Zornotzako Julen Alberdi (baxua), eta rock talde bat sortzea erabaki zuten. Gerora, Dani Galiziara joan zen, eta bere lekua betetzeko Gorka Olaeta (gitarra) batu zen taldera.

Boskoteak, 2006an Los 40 principalesen entzuten zen musika aipatzen du eraginen artean. Horrez gain, Green day talde estatubatuarraren jarrera punkiaren indarra. Aipatutakoen nahasketa freskoak dira taldearen kantak: estribillo itsaskorrak, erritmo alaiak eta letra dibertigarriak. Mezua tristea bada ere, melodiak positibo bihurtzen du kanta.

Azaroan, Ultramarinos Costa Brava estudioan (Girona) 8 egun igaro zituzten Santi García ekoizlearekin (Berri Txarrak, La M.O.D.A eta Gatibu taldeen ekoizle bera) 30 minutuko iraupena izango duen haien lehenengo lan luzea grabatzen. Asko ikasi dutela aipatzen digu Julen Alberdi baxu-jotzaileak: “24 orduz ibili ginen bakarrik diskoa prestatzen, ez da hemen egiten den moduan, goizean lanera joan eta arratsaldean grabatu, profesionalagoa izan zen”. Horrek taldea gehiago batzea eragin duela adierazi du.

Kontzertu bat egoera honetan ematea arraroa dela aitortu digu Gorka Etxeberria abeslariak: “Ez dituzunez haien aurpegiak ikusten ez dakizu jendeari gustazen zaion edo ez, gainera jendeak ez ditu abesti gehienak ezagutzen”.

Hala eta guztiz ere, Gominolas harrera beroa izan du eta jendeari gustatu zaio. “Bizkaia Irratian eta Radio Nervionen gure kanta entzun zutela esanez idazten ziguten lagunek, horrez gain Euskadi Irratitik eta Gaztea irratitik elkarrizketak egiteko deitu digute”.

Abestiak banaka kaleratuko dituzte, baina diska ere egongo da. Urte hau promoziorako eta singleak publikatzeko erabiliko dute, eta hurrengo urtean, eszenatokiz eszenatoki ibiliko dira.

Momentuz, lau kantu argitaratu dituzte: 2019an Incendio, En carne viva eta Yo ya sé que tú no me quieres nada. Otsailean, Gominolas kalera atera zen, 2021ean argia ikusiko duten abestien lehen aurrerapen gisa.

Jon Castañeda

Udal liburutegiak aurrez aurreko mailegua eta digitala indartu ditu bere zerbitzuak egokitzeko

– Oraingoz behintzat liburutegian bertan irakurtzeko aukerarik ez dago, horrela, egoera hau orekatzeko, film eta liburuen aurrez aurreko mailegua eta mailegu elektronikoa hobetsi nahi izan dira.

– Orain arte Liburutegiak abian jarritako ekimen eta ikastaroek ere bizi dugun egoera saihestea lortu dute eta aurrera jarraitzen dute aurrez aurreko formatuan.

Pandemiaren ondorioz bizi dugun egoera oso gogorra da guztiontzat eta liburutegiek ere gogor egin dute lan aurrekaririk gabeko egoera zail honetara egokitzeko. Horrela, Amorebieta-Etxanoko udal liburutegia ez da atzean gelditu eta berrasmatu egin da erabiltzaileei ahalik eta zerbitzurik onena ematen jarraitzeko, betiere segurtasun neurri zorrotzenekin.

Oraingoz behintzat, eta bizi dugun egoera zailera egokituta, ez dago liburutegian bertan irakurtzeko aukerarik. Egoera hori konpentsatzeko, filmak eta liburuak aurrez aurre eta elektronikoki mailegatzea erabaki da, herritarrei zerbitzu eraginkor eta segurua eskaintzeko. Horregatik, liburutegira sartzean ezin izango da materialik ukitu; beraz, liburuak aukeratzeko orduan, liburutegiko langileen gomendioak jarraitu beharko dira edo on-line katalogoa berrikusi eta aldez aurretik hautatutako liburua ekarri.

Euskadiko udal-liburutegien katalogo bateratuak aukera ematen du funtsak bi hizkuntzetan kontsultatzeko, bai eta maileguen aleak eta egoera eskatu, erreserbatu eta kontsultatzeko ere, eta Internet bidez berritzea ahalbidetzen du. Katalogoaren helbidea katalogoak.euskadi.net/katalogobateratua da.

Nabarmendu, aukera guzti hauez gain, e-liburutegia, Eusko Jaurlaritzaren liburu eta film elektronikoen maileguaren zerbitzua ere kontsultatu daitekeela katalogo anitz eta zabala eskuragarri izanik.

Ikasgela ere erabilgarri dago 32 pertsonako mugarekin honako ordutegian: astelehenetik ostiralera 8.30-14.00 / 15.00-20.30, larunbatetan 10.00-14.00 / 17.00-20.00. Haurren liburutegia itxi egon arren, liburuak liburutegian bertan eskatzeko eta eramateko aukera dago.

Orain arte egindako ekimenei dagokienez, azpimarratu behar da hizkuntzak maite dituztenek Hizkuntzen mintzapraktikak programaz gozatzeko aukera izaten jarraituko dutela. Programa honek, normalean hizkuntza jakin bat hitz egiteko ohitura duen pertsonak eta ohitura edo ezagutza hori ez dutenak biltzen ditu. Ingeleseko bi talde daude astelehenero eta frantseseko talde bat asteazkenero.

Irakurketa Klubak ere prozedura berbera darama. Kasu honetan euskarazko eta gaztelerazko taldeak daude. Dinamizatzailea hilen behin elkartzen da parte-hartzaileekin eta aldez aurretik irakurritako liburu bati buruz mintzatzen da. Liburua aukeratuta dago eta beraren komentarioa egiten da.

Liburutegiak Irakurlearen Txokoa ekimena ere proposatzen du. Kasu honetan, parte-hartzaileek irakurtzen ari diren liburua baloratzen dute. Ez da liburu zehatz bat aukeratzen, pertsona bakoitzak berea komentatzen du, filmak, erakusketak edo antzerkia bezalako diziplina anitzak jorratuz. Nabarmendu, pasadan abenduan Irakurlearen txokoak 10 urte bete zituela eta horren omenez dokumental bat egin zela.

Ipuin kontalariak ere badu bere tokitxoa liburutegiaren programan. Pandemia hasi zenetik telematikoki burutu da baina hemendik aurrera aurrez aurreko formatua berreskuratzea espero da. Ildo horretan, mota honetako ekimenek aukera ematen dute liburutegia udalerrian kultura dinamizatzeko elementu gisa erabiltzeko, bere jarduera osoa liburuetara mugatu gabe.

Inauteriak otsailaren 12tik 16ra bitartean ospatuko dira, aurrez aurre zein online garatutako hainbat ekitaldirekin

Otsailaren 12an, ostiralean, inauterietako maskarak egiteko tailerrek emango die hasiera inauteriei Zelaietako ludotekan 17: 00etatik 19: 00etara (6-10 urte).
Pirritx, Porrotx eta Marimototsen itzulera eta GO!AZEN 7.0 taldearen zuzeneko musika izango dira ekitaldi nagusiak, besteak beste, photocall originala eta online mozorro lehiaketa ere nabarmentzen diren programazio batean.

Amorebieta-Etxanok inauteri ezberdin bat biziko du. Ez da horregatik makalagoa izango. Udalak bizi dugun egoera zailera egokitutako programazioa prestatu du, ziur aski inori huts egingo ez diona. Horrela, inauterietako sugarra bizirik mantentzeko. antolakuntzak otsailaren 12tik 16ra bitartean egingo den programazioa berrasmatu du aurrez aurrez zein online garatutako hainbat ekitaldirekin.

Otsailaren 12an, ostiralean, inauterietako maskarak egiteko tailerrek emango die hasiera inauteriei Zelaietako ludotekan 17: 00etatik 19: 00etara (6-10 urte). Aukera paregabea inauterietako maskara moduan talentu sortzailea askatzeko. Izena Gazte Informazio Bulegoan eman beharko da otsailaren 1etik 4ra bitartean eta plazen zozketa otsailaren 5ean egingo da.

Otsailaren 12an, ostiralean, Amaren intxaurrak ikuskizuna aurkeztuko dute Pirritx, Porrotx eta Marimototsek Zornotza Aretoan saio bikoitzean, 17:15 eta 19:15. Sarrerak Zelaieta zentroan Ametx Txartelarekin izena emanda urtarrilaren 18tik 21era egongo dira eskuragarri. Hala ere, ostiral honetan, urtarrilaren 22an, sarreren zozketa egingo da izena eman dutenen artean. Gehienez pertsona bakoitzeko 4 sarrera hartu ahal izango dira. Eta ostiraleko jardunaldia ixteko, 19: 00etatik aurrera Zelaietako kontzertu aretoan zuzeneko musika Supercremalleras taldearen eskutik.

Larunbatean, otsailak 13, GO!AZEN 7.0. Zornotza Aretora itzuliko dira beren gazte musika ikuskizunarekin saio bikoitzean, bata 12:30etan eta bestea 17:00etan. Aurten, antzokietan inoiz egin ez duten ikuskizun berri batekin datoz: kontzertu bat! Denboraldi honetako sei aktore oholtza gainean arituko dira kantuan, dantzan eta telesailari buruzko kontu dibertigarriak azaltzen. Kasu honetan ere, sarrerak urtarrilaren 18tik 21era bitartean egongo dira salgai Zelaieta Zentroan Ametx Txartelarekin izena emanez eta ostiral honetan, urtarrilaren 22an, sarreren zozketa egingo da izena eman dutenen artean. Pertsona bakoitzak gehienez 4 sarrera izango ditu.

Otsailaren 13an eta 16an, inauterietako larunbatean eta asteartean, hurrenez hurren, inauteri-jaiaren osagarri gisa, photocall pertsonalizatu original bat egitea proposatzen dizuegu argazki dibertigarriak atera ahal izateko. Inauterietako Photocall hau 16: 00etatik 20: 00etara egongo da eskuragarri Zelaietako ludotekan (3-10 urte). Izena Gazte Informazio Bulegoan eman beharko da otsailaren 1etik 4ra bitartean eta plazen zozketa otsailaren 5ean egingo da. Larunbat eta asteartean ere, Jokogunearen edizio berezia izango da Zelaietako kontzertu aretoan 19: 00etatik 20: 00etara (10 urtetik gora).

Online egingo diren jarduerei dagokienez, bereziki nabarmentzen da inauterietako mozorro lehiaketa. Parte hartu nahi duten erabiltzaileek erabilitako mozorroaren argazki bat bidali beharko dute kultura@amorebieta.eus helbidera, otsailaren 12tik 15era. Argazki guztiak Facebook@ametxzornotza orrian argitaratuko dira. Otsailaren 16an bi irabazle aukeratuko dira eta sariak 100 euroko bi bonu izango dira Dendariak dendetan erabiltzeko.

Ostiralean, otsailaren 12an, Perubelerek ongietorria egingo dio inauteriei «20PERUBELINE21» bideoarekin, udazkeneko txistulariekin batera eta larunbatean, otsailaren 13an, dantza izango da protagonista Udabarri Dantza Taldearekin. Online ekitaldi guztiak 11:00etatik aurrera egingo diraAmorebieta-etxano.eus eta zornotzaaretoa.eus web-orrialdeetan.

Asteburu honetan, hitzordu bikoitza zinearekin Zornotza Aretoan

– Gaurtik astelehenera (berau barne), 19.00etako saioan, Perfumes Grégory Magne zuzendari frantziarraren lan berria ikusteko aukera izango da.
– Bigarren hitzordua etxeko txikienei zuzendua: Alemanian haurrentzako film hoberenaren saria jaso duen Rocca cambia el mundo filma, larunbatean eta igandean 12:00etatik aurrera.

Gabon osteko asteburu honetan, zinea eta Gauero gazte ekimena izango dira kultura agendaren protagonista nagusiak. Ez da parada hoberik Gabonetako ferenetismoa atzean uzteko eta asteburuaz lasaitasunez gozatzeko. Lehen hitzordua, gaur bertan, urtarrilaren 8an, Zornotza Aretoan: gaurtik astelehenera (berau barne), 19.00etako saioan, Perfumes Grégory Magne zuzendari frantziarraren lan berria ikusteko aukera izango da.

Filme honetan, Anne Walberg lurrinen munduko izar bat da. Lurrinak sortzen ditu eta bere talentu sinestezina enpresa mota guztiei saltzen die. Diba bat bezala bizi da, berekoia eta izaera handikoa. Guillaume da bere txofer berria, eta bere inguruko pertsona bakarra, hari aurre egiteko beldurrik ez duena. Eta hori da, zalantzarik gabe, berak ez kaleratzeko arrazoia. Oso desberdinak diren bi munduren arteko talka, harreman zentzugabea eta dibertigarria sortzen duena, eta aldi berean ustekabekoa. Film xume eta iradokitzaile baten aurrean gaude; komedia dramatiko guztiz frantsesa da, baina zeharo gozagarria. Aromen negozioari buruz ondo ikertutako aurpegia da haren gauzarik interesgarriena.

Bigarren hitzordua etxeko txikienei zuzendua: Alemanian haurrentzako film hoberenaren saria jaso duen Rocca cambia el mundo filma, larunbatean eta igandean 12:00etatik aurrera Zornotza Aretoan. Ausarta, dibertigarria, nahastezina: hura Rocca da. Hamaika urte ditu eta ez da gurasoekin bizi, bakarrik bizi da etxe handi batean. Beldurrik gabe eta jakin-minez beterik, mundua zeharkatzen du, Geralden ezohiko lagun bat aurkitzen du eta gelako handiputz bihurtzen da bere eskola berriko lehen egunean. Roccarentzat garrantzitsuena, ordea, bere amonaren bihotza irabaztea da.

Filme honek ‘Pippi Kaltzaluze’ ilegorriarekin dituen antzekotasunak asko dira, biak Astrid Lindgren idazle suediarraren lumatik baitatoz, baina Pippilotta Långstrumpen bertsio garaikide honek atributuak irabazi ditu, haurrak teknologia berriekiko mendekotasunari aurre egiteko prestatzen dutenak, eskola-jazarpena errotik eteteko moduari buruzko diskurtso osasuntsu eta koherente bat aurkeztuz.

Azkenik, gogoratu larunbat honetan Gauero gazte ekimenaren beste jardunaldi bat ospatuko dela. Gauero 10 urtetik gorako gazteentzako gaueko aisialdi programa da. Gazteen interesekoak diren gaien inguruan antolatutako hainbat ekintza desberdin burutzen dira: light diskoteka, gau tematikoak, mahai-jokoak, bideojokoak, eskulanak, etabar. Jarduera hauek gazte bakoitzari bere identitate pertsonala eta taldekoa eraikitzeko baliabideak emanez, partehartzea eta sormena bultzatuz, eta bere aktibotasuna indartuz burutzen dira, betiere errespetuan oinarritutako aniztasunarekiko begirada positiboa sortuz. Parte hartzeko beharrezkoa da Ametx-txartela, Gazte Txoko Txartela edo Gazte Txartela bezala aktibatuta izatea. Larunbatero ospatzen da, 20:00-23:00 ordutegian eta burutzen diren jarduerak doakoak dira.

Dena prest Amorebieta IV Pilotalekuan bihar Errege Magoei harrera egiteko

• Haiekin egoteko, aurretiazko hitzordua zornotzaaretoa.eus web gunean hartu beharko da.
• Meltxor, Gaspar eta Baltasarrek, 11.00etatik aurrera, amorebieta-etxano.eus eta zornotzaaretoa.eus web guneetan ikusi ahal izango den mezu bat bidaliko dute bideo baten bitartez.

Pandemiak Amorebieta-Etxanoko Errege Kabalgata bertan behera uztea eragin badu ere -urtero milaka herritar eta bisitari biltzen zituen-, Ekialdeko Maiestateak ez dira faltako etxeko txikienekin izango duten hitzordura. Horrela, bihar, urtarrilaren 5ean, Zelaietan dagoen Amorebieta IV Pilotalekura hurbilduko dira Gabonak agurtzera; 16:00etatik 20:00etara, etxeko txikienek Meltxor, Gaspar eta Baltasarrekin hitz egin ahal izango dute hainbeste espero dituzten opariak eskatzeko.

Haiekin egoteko, aurretiazko hitzordua zornotzaaretoa.eus web gunean hartu beharko da eta hartzerakoan, ordua eta norekin egon nahi den (Meltxor, Gaspar edo Baltasarrekin) zehaztu beharko da. Zita bakoitzean, familia unitate bakoitzeko 4 kide sartu ahal izango dira. Ordua baino 5 minutu arinago egotea eskatzen da Amorebieta IV frontoiko atean. Familia bakoitzak zehaztutako lekutik argazki bat ateratzeko eta eskutitza emateko aukera izango du.
Segurtasun neurriei dagokienez, maskara erabiltzea derrigorrezkoa izango da. Pertsonalaren argibideak uneoro jarraituz, eskuak garbitu beharko dira sarreran eta segurtasun distantzia mantendu beharko da.

Baina Amorebieta IV Pilotalekura hurbildu aurretik, etxeko txikienek ere tartetxo batez gozatu ahal izango dute Ekialdeko Maiestateekin batera, baina modu birtualean. Meltxor, Gaspar eta Baltasarrek, 11.00etatik aurrera, amorebieta-etxano.eus eta zornotzaaretoa.eus web guneetan ikusi ahal izango den mezu bat bidaliko dute bideo baten bitartez. Adi egon haiek esan beharrekoei!

www.amorebieta.com – Hilero Zornotzan © 2021

Ir arriba.