Udazken Txistulari Taldeko kideak 1997. urteko irailean irten ziren lehen aldiz Zornotzako kaleetara. Ordutik hona hogeita bost urte pasa dira ia, eta herriko kultura talde egonkorrenetakoa bihurtu da. Abuztuan izan ezik, urteko domeka guztietan egiten dute kalejira taldeko kideek, negu zein uda. Baina, Zornotzak duen hondare kultural horretaz gainera (ez baitira asko Euskal Herrian zehar asteroko ohitura hori duten herriak), hitzordu nagusi bi izaten ditu taldeak urtero: batetik, herriko jaietan hainbat musikarirekin batera eskaintzen duen alardea; eta, bigarrenik, Euskal Herri zabaleko txistulariak hartzen dituen eta aurten hogeita batgarren ekitaldia izango duen Txistulari Eguna. Halaber, ezin aipatu gabe utzi santikurutzetan hasi eta santaluziak arte auzorik auzo ibiltzen direla udazkendarrak txistu doinuak zabaltzen.
Zornotzaren eta txistuaren arteko harremanak sustrai sakonak ditu; izan ere, Txistulari aldizkariak dokumentatuta dauka herriak udal txistulari ofiziala eduki izan duela. Eta haria ez da eten: berrogeita hamarretik gora kide izan ditu Udazkenek sorreratik gaur arte, eta Zubiaur Musika Eskolak harrobi izaten jarraitzen du gaur egun Udazken taldearentzat.
Laburbilduz, herritik eta herriarentzat diharduen taldea da Udazken. Azken batean, tradizioa eta modernitatea uztartuz, txoko eta bazter guztiak txistu hotsez eta euskal kulturaz busti dituen lagun kuadrilla. Eta, zornotzarrek nahi duten bitartean, hala izaten jarraituko du.
