Jantour izena du El Correo egunkariak gastronomiaren inguruan ostiralero argitaratzen duen gehigarria. Aurtengo sarietan sukaldari gazteen artean Julen Baz, Urtza Tabernako magoa aukeratu dute. Pozik hartu du berria eta saria jasotzerakoan ez du ahaztu nahi izan herriko beste sukaldari bat. “Eneko Atxak erakutsitakoa oso baliogarria izan da niretzako, ofizio honetan iraunkortasuna, lana eta profesionaltasuna behar delako”. Eneko Atxa bertan egon zen, Bittor Arginzoniz, Etxebarri jatetxeko sukaldariari saria emateko, iaz Eneko berak hartutako saria hain zuzen ere.
Sekretoa, Julenen esanetan, lana da. “Arginzonizek esan duen moduan, hemen ez dago besterik, lan eta lan. Ordu pila bat sartzen dodaz Urtzan, ateak itxita izan arren, igande gauetan, astelehenerako menuak aurreprestatzen egoten naz, askotan 16 ordu jarraian lan egiten dot, bakarrik nago sukaldean eta 14 menu prestatu behar dodaz egunero”.
Urtza Tabernan 7 platerrez osatutako menua jan ahal da 24 euroen truke. “Gero eta lan gehiago dekot, baina gero eta pozago nago. Egunero nire listoia gainditzen saiatzen naz. Menua sorpresaz beterik egotea gustatzen zait. 3 Izarretako jatetxera baldin bazoaz badakizu zertara zoazen, baina Urtzan sartzerakoan, lehen aldian batez ere, izugarrizko sorpresa hartzen du jendeak. Eta hori gustatzen zait”.
Urtza Tabernaren leloa “Ametsak sukaldatzen” da. Eta sukaldari honek badu ere bere ametsa. Ziur gaude beteko duelarik. Eta zornotzarrok hor izango gara bere alboan. Zorionak Julen!!!
