Dagoeneko bukatu dira Amorebieta-Etxanoko Musika Eskola berria eraikitzeko lanak. baina COVID-19 dela eta, ezingo da inauguraziorik ezta jai berezirik egin Jaietan, aurreikusita zegoenez.
Ruper Lekue Zubiaur Musika Eskolaren zuzendariak esan digunez, irailaren 14ean klaseak hasteko asmoa du, ezer okertzen ez bada. “Orain kontingentzia plana egiten ari gara, eta horretarako hipotesi guztiak aurreikusi behar ditugu; mugikortasun osoa edota murrizketa larria. Nondik sartu, segurtasun distantziak, zenbat ikasle gela bakoitzeko…etabar, laster dena prest izango dugu ikasturte berria hasteko”, Ruper Lekueren esanetan.
2006. urteko irailean hasi zuen Zubiaur Musika Eskolak bere ibilbidea. Andra Mari eleizaren alboko eraikuntzan behin behineko egonaldia 5 urterako zela uste zuten arren, 14 urte igaro dira eraikuntza berria izan arte. “Pozaren pozez gaude, azkenik toki aproposa izango dugulako. Oporrak baino lehenago trasladoa egingo dugu, instrumentoak eramango ditugu eta dena prest utziko dugu ikasturte berrirako”.
Piano, kitarra, trikitrixa, saxo…instrumentu asko daude aukeratzeko. Honez gain, koroak, dantza taldeak… “Momentuz ez dugu eskaintza zabalduko, baina kantu asignatura martxan jartzeko asmoa dugu, demanda handia dagoelako”.
Zubiaur Musika Eskolan 550 ikasle eta 24 irakasle ari dira. “Eskaintza handia dugu Zornotza moduko herri batentzat. Hemen zaletasun handia dago, ez bakarrik gazte mailan baita ere helduen artean, jubilatuak ere ditugu. Gainera 140 haur eta gazte ari dira dantza taldeetan ere; sormeneko dantzan eta hip hop taldean, koroak ditugu eta musika talde ugari sortu dira. Honez gain, aurten izugarrizko albiste ona izan da Zornotzako Musika Banda. Emaitza onak lortu ditugu urte hauetan”, zuzendariaren iritziz.
Urtero ikasle pare bat kontserbatoriora doaz. “Une gogorrak izaten dira eurentzat, izan ere Batxillergoa eta Kontserbatorioa batera egin behar dute, entsaio asko eta ordu gehiago, baina musikarekiko zaletasunak horretarako indarra eta grina ematen die”.
