Euskaditik Tour de France 2023ren irteerako ekitaldi handiaren baitan, Euskadiko hiru Ostalaritza Elkarteek, Erakundeek eta Grand Départ Pays Basqueko antolatzaileek bakailao ‘TOURtilla’ aurkeztu dute, Eneko Atxak abagune berezi honetarako bereziki sortutako pintxoa. Ekitaldian Ainara Basurko (Bizkaiko Foru Aldundiko Ekonomia Sustatzeko Diputatua), Cristina Múgica (Bizkaiko Foru Aldundiko Lurralde-lehiakortasuneko eta Turismoko zuzendaria) eta Xabier Ochandiano (Bilboko Udaleko Ekonomiaren Garapen, Merkataritza eta Enpleguko zinegotzia) egon dira, Euskadiko hiru Ostalaritza Elkarteetako ordezkariekin bat.
Ahogozagarria Bilboko Goi Mailako Ostalaritza Eskolan erakutsi dute, eta bideo baten bidez, sukaldariak berak (ezin izan da bertaratu lan-arrazoiengatik) errezetaren xehetasunak eta miniatura goxo honen elaborazioa azaldu ditu. Kasualitatez, Eneko Atxa Amorebieta-Etxanokoa da, Frantziako hirugarren etapa abiatzen den udalerrikoa. Sukaldariak berak adierazi duen bezala, “erronkak asko gustatzen zaizkigunez eta uztail honetan oso garrantzitsua den bat daukagunez, sukaldariak eta ostalariak ere prest gaude une handi honetan parte hartzeko”.
“Ideia bi pasiotatik sortzen da. Txirrindularitzatik, hemen oso errotuta dagoen zerbait baita guretzat, eta gastronomiatik, pintxoetatik kasu honetan, errotze eta erakarpen ahalmen hori ere badutelako. Hortik sortu zen bakailaoa, bertako barazkiak, baserriko arrautzak… erabiliz ‘TOURtilla’ bat egiteko ideia. Horrela, kolektibo polit hau osatzen dugun kide guztiok geure kolorea emango diogu marea hori handiari”, azaldu du Azurmendi jatetxeko jabeak.
Chef ezagunaren iritziz, “Tourra bezalako gertakari garrantzitsu baten aurrean, nor garen, non gauden, modu berezian adierazteko aukera izan daiteke pintxoa. Hemengo jendeak oso ondo ezagutzen duen zerbait da, gozatzen jarraitzen duguna, eta badakigu, esperientzia propioz ezagutzen dugu, bisitatzen gaituzten guztiek gure lurraldearen zati bat eramaten dutela, gauzak ulertzeko dugun moduarena, gure izaerarena, pintxo moduan. Pintxoak enbaxadore zentzu hori du”, nabarmendu du.
Dastatu hemen TOURreko pintxoa
Aurkezpen-bideoa eta errezetaren tutoriala Euskadiko ostalari guztien eskura jarriko dira Grand Départ Pays Basqueko webgune ofizialean eta ostalaritzako hiru elkarteetako edozeinetan. Horrela, errezeta errepikatu ahal izango dute eta jendeak bere establezimenduetan dastatu ahal izango du.
Bakailao ‘TOURtilla’ eskaintzera animatzen diren establezimenduek “Dastatu hemen TOURreko pintxoa” kartel identifikatzailea erakutsiko dute establezimenduen kanpoaldean.
