Zornotzako Gure Esku Dagok jarraitzen du datorren maiatzaren 7an Euskal Herriko hainbat eta hainbat herritan, eta gure herrian ere, egingo den Herri-galdeketa prestatzen eta bultzatzen.
Horren harira, joan den larunbatean, martxoak 4, Euskal Herria enparantzan (Pike Parken) antolatutako ekintzetan jende asko eta jai-giro bikaina egon zen. Bertaratu zirenek txosna eta talo ezin hobeak dastatzeko aukera izan zuten, musikaz lagundurik, Etxanoko talde dotoreak Agate Deunako koplak kantatzen zituen bitartean.
Sinadurak biltzeko jarri zen mahaian ehundik gora sinadura gehitu ziren eta dagoeneko gutxi falta da helburura iristeko.
Bestalde, Zornotzako hainbat dendek emandako produktuekin luxuzko otzara erraldoia osatu ahal izan dugu eta errifak salgai egongo dira zozketa egingo den egunera arte, martxoaren 25a.
Lerro hauen bidez, eskerrak eman nahi dizkiegu herriko dendei Otzara eder hau osatzeko emandako laguntzagatik eta joan den larunbatean egun ederra pasatzera Pikera etorri ziren zornotzar guztiei.
