Zigor Goitiandia idazle zornotzarrak bere bigarren liburua argitaratuko du datorren abenduan. Oraingoan euskerazko edizioaz gain, erderaz ere egin du, “El Relicario” izenburuarekin. Idazte prozesuan asko gozatu duela aitortu digu Zigorrek, eta nobela hau aurrekoa “EL Camaro destartalado” baino hobeagoa izango dela ziur da.
Bi mila urte desagertuta egon ondoren gazte baten eskuetara iristen da `Zaharkin Santua´. Hasieran ez dakite honen balioaz, baina beste talde batzuek eskuratzeko egiten dituzten ahaleginak ikusita, eurek etekina atera nahi dute. Nobela bat da, asmatutako kontakizuna benetako historia baten barruan, hau da, iraganaldiko gertaera gogoangarri baten barnean gertatzen dena.
Zigorrek Arabako Errioxan, Bilbon eta Ziortzako Monastegian kokatu du nobela. “Gaur egun bisitatu ahal diren tokiak agertzen dira. Oso era dinamikoan idatzita dago, hizkuntza zuzena, arin irakurtzeko modukoa. Kritika soziala dago liburuan, satira eta umore garratza erabiltzen dut eta fikzioko pertsonai batzuek sartzen ditut benetako gertaeretan”.
Irakasle honek urte bi eman ditu liburu berri hau idazteko. “Gauez idaztea gustatzen zait, etxekoak ogera joaten direnean. Orduan buru belarri hasten naiz idazten eta askotan, konturatu barik, ordu pila bat lapurtzen dizkiot nire loaldiari”.
Idazten hasi zenean, Zigorrek ez zuen “Zaharkin Santua” nobelaren amaiera pentsatuta, eta bidean agertu den pertsonai baten harira burutu zitzaion bukaera. Baina hori irakurtzeko egun batzuk itxaron beharko dugu, abenduaren erdialderako prest izango baita liburua.
Zornotzako dendetan eta Elkarren salgai egongo da.
