• Ordutegia murriztua izango da, eta liburuak mailegatu eta itzultzeko zerbitzua bakarrik eskainiko da. Zentrora maskararekin sartu beharko da eta bi metroko segurtasun distantzia gorde beharko da.
• Mailegua telematikoki eskatuko da eta mailegatutakoa zentroko harreran jasoko da, liburutegira sartu beharrik dabe.
• Eraikinaren sarreran orga bi egongo dira liburuak itzultzeko, eta itzulitako liburuak 15 egunean koarentenan egongo dira.
Amorebieta-Etxanoko Udalak gaur ekin dio berriro aurrez aurreko zerbitzuari. Erabiltzaile eta langileen osasun segurtasunak lehentasun osoa du Udalarentzat. Horregatik, liburutegia ireki arren, babes neurriekin eta zerbitzu mugatuekin irekiko da: liburuak mailegatzeko eta itzultzeko zerbitzua bakarrik eskainiko da.
Gainera, jendaurreko ordutegia murriztua izango da. Astelehenetik ostiralera 09:30etik 13:30era eta astean arratsalde bitan, astelehenetan eta asteazkenetan, 17:00etatik 19:00etara.
Eraikineko harrerara doazenek banan-banan egin beharko dute, eta bi metroko segurtasun tartea gorde beharko da (jarri diren seinaleak errespetatu beharko dira). Maskara erabiltzea beharrezkoa izango da, baita zentroko harrerako atean dagoen gel desinfektantea erabiltzea ere.
Jendetza ekiditeko, liburu eta bestelako materialen mailegua, esaterako DVD edo CDak, aldez aurretik eskatu beharko da 946300626 telefono zenbakira deituz, mezu elektroniko bat bidaliz liburutegia@amorebieta.eus helbidera edo OPAC online katalogoaren bidez. Eskaria egin eta biharamunetik Zelaieta Zentroko harreran jaso ahal izango da, eta ez da liburutegira joan beharrik egongo.
Itzulketari dagokionez, material guztia eraikinaren sarreran egongo diren bi orgatan utzi beharko da. Gainera, liburutegiak 15 egunez koarentenan utziko ditu itzulitako artikulu guztiak, berriro ere herritarrek mailegatu ahal izateko.
Konfinamenduko aste hauetan, Amorebieta-Etxanoko udal liburutegia erreferentziazko zentro birtuala bihurtu da, zerbitzu eta jarduera guztiak online eskainiz. Gaurtik aurrera, normaltasunera itzultzen hasiko da apurka-apurka, zornotzarrentzako osasun eta segurtasun berme guztiekin.
