Orain arte Ultra Trail lasterketak egiteagatik ezagutu izan dugu Zigor Iturrieta, eubatarra. Baina oraingoan ez gara horretaz mintzatuko, baizik eta sukaldaritzaz. Izan ere, Zigor ETB-1ko Txoriene izeneko sukaldaritza programaren aurkezle berria dugu.
Hilaren 9an estreinatu da Txoriene Zigor Iturrietarekin eta egunero ikusi ahal dozue arratsaldeko hiruretan hasita. “Nire lanbide sukaldea izan da beti, orain arte eskoletarako menuak prestatzen dituen enpresa batean egon naiz lanean, lagun batek telebistan kasting bat zegoela esan zidan arte”.
Kasting horretan patatazko tortila egiteaz gain, kamara aurrean berba egin behar zuen ordu erdi batean. Zigor oso ondo prestatu zen, patataren historia ikasi zuen eta ordu erdi horretan isildu barik egon zen. “Hurrengo egunean deitu zidaten programa niretzako zela esanez. Gainera, nik batueraz egin ahal dot eta behar izanez gero bizkaieraz eta gipuzkoeraz ere bai”.
Astean birritan grabatzen du programa Miramonen eta bera arduratzen da denetaz. “Erosketak egin, platerrak prestatu, kolaboratzaileak aurkitu eta gaiak prestatu. 60 programa egingo ditugu orain eta ondo baldin badoa gehiago sinatuko ditugu. Horrela bada laguntzaileren bat jarriko didate”.
Gaur egun sukaldaritza programa mordoa daude telebistan, kalitate handikoak denak. Horren artean nola konpetitu da arazoa, zer eskeini, nola egin, zer kontatu… Zigorrek planifikazio bikaina egin du denboraldi honetarako. “Astelehenetan kirolarien bisita izaten dugu, astearteetan elikadura dietista batekin, asteazkenetan amamen eta aititeen eguna, ostegunetan euskal ekoizleak eta ostiraletan umeak. Beste ikuspuntu batzuk jorratzen ditugu platerak prestatzen ditudan bitartean. Umeak, adibidez, gurekin sukaldean badira gero ez dute erreparorik arraina jateko, mendira edo hondartzara joateko picniak egin, urtebetetze jaietarako menu bereziak, jolasak asmatzen ditugu plateren diseinuekin, etabar ”.
Badakizue, sukaldaritza ikasi nahi baduzue eta ordu entretenigarria igaro, arratsaldero ETB-1n Txoriene Zigor Iturrietarekin.
