Euskadiko ordezkaritza handia joan da gaur Parisera 2023 Tourraren aurkezpenera. Iñigo Urkullu lehendakaria, hiriburuetako alkateak eta nola ez, Andoni Agirrebeitia, Amorebieta-Etxanoko alkatea. Gure herritik irtengo baita, uztailaren 3an, hirugarren etapa Baionan bukatzeko.
“Aurkezpena ikaragarria izan da, esan digu Andonik, Lehendakaria hitzaldia ematera igo denean oso harro sentitu gara euskaldunok, izan be gure aberria zer dan, zer garen, munduari zabalduko dugu eta. Amorebieta-Etxanorentzat inoiz egon den ekitaldirik handiena izango da, mende askotan ez dugu horrelakorilk berriro ikusiko”.
Zornotzatik abiatu eta Bizkaiko eta Gipuzkoako kostaldeko errepideak atzean utzi ondoren, txirrindulariak Iparraldean sartuko dira Baionako helmugara iritsi arte. Jardunaldiak 185 kilometro izango ditu, ia guztiak lauak, eta aurreikuspenen arabera, esprinterrek euren trebetasunak erakusteko lehen aukera izango dute.
