Zornotzan

Partekatu

SARA ESTEBEZ ‘Kanela hautsetan’

Sara_argazkia_web

Gozogintza hitza entzute hutsarekin geure zentzumenak piztu eta dastatzeko prest dabiltzala dirudi, ezta? Ba, ez ditzagun makaldu, ez ditzagun hustu eta eman diezaiegu eskatzen dutena. Argi du hori geure “Partekatu” atal berria estreinakoz jantziko duen Sara Estevez Eguskiza zornotzarrak, bere “Kanela Hautsetan” txoko preziatuarekin. 

Gutiziek eta gozoek, oro har, geure dastamena pizten duten zalantzarik ez dugu, irribarre eder bat sortzeko gai ere baitira. Sararen hitzetan, “gozoa jaten dugunean, gure garunean dopamina eta serotonina substantzia kimikoak aktibatzen dira eta ongizate emozionalarekin erabat erlazionaturik daude”. 

Gainera, hari beretik, “plazerra eragiteaz gain, bizitzako momentu askorekin lotu ohi ditugu, eta askotan, momentu onekin izan ohi dira; bai aisialdiarekin, lagunekin, baita familiarekin momentu on bat pasatzearekin ere”. Ezin uka dezakegu, beraz, momentu on bat momentu gozo bilakatzeak plazer bikoitza dakarrela. 

Gozogintza zaletasun soil bat baino gehiago, ihesbide gisa definituko luke Sarak; izan ere, “ni oso pertsona urduria naiz eta ezin naiz geldirik egon, hortaz, gozogintzak desestratzen laguntzen nau eta lasaitasuna eskaintzen dit”. Une batez, mundua gelditu, sukaldean egon, musika jarri, eta postreak sortzen hasteak lasaitzeaz gain, poztu ere egiten du Sara. A zer nolako terapia polita, askorentzat dugu sukaldea norberarekin konektatzeko erraminta bikaina, eta hori nolabait zapore bidez helarazteko aukera. Uztartze bikaina bai, behintzat.

“Basque Culinary Center” eskola ezagun eta ohoretsuan sei hilabete inguru eman zituen zornotzarrak unibertsitate-ikasketak hastean, beste bide bat hartu eta erizaintzaren munduan murgildu arte. Denbora baliotsua, ordea, bertan emandakoa, “esperientzia oso polita izan zen, eta orokorrean, asko ikasi nuen”. Gainera, okindegiari eta gozogintzari zuzendutako irakasgai bat zeukaten eta hortik abiatu eta sortu zen gerora bere egungo pasioa.

Hastapenen oroitzapena, geroaren ilusio

Metafora tankera ere badu, agian, ezta? Eskuekin egiten den eskulan gisa, eta gainera, gozoa eta jendea erabat alaitzen duena. “Txikitatik gustatu izan zait sukaldaritza eta ordu pila eman ditut amamarekin sukaldean. Asko ikasi dut berarekin batera”. Zeinen polita irakaspen hori eta irakasle kuttun horren ondoan ikasi izana.

Sararen hitzetan, “pandemia ostean, 2021.urtean, proiektu honi hasiera eman nion, ZIUko, Zainketa intentsiboetako unitateko, nire lankideek animatu nindutelako. Txandaka lan egiten nuen eta egoera gogorrak bizi ohi genituen, egunero, eta txanden arteko kafea neuk egindako gozoekin alaitzen genuen”. Lankideak izan ziren, hortaz, lagunekin eta familiarekin batera, bere gozoen arteko aukeraketa egiten lagundu, eta une oro, bere sortze-prozesuan aldamenean egon direnak. Ibilbidea bere irudimenarekin eta jakinminarekin bideratu duen bitartean.   

Lana, gozogintza, crossfit-a, argazkilaritza, denak dira Sara eta dena nahi lukeen bezala egiteko eta denbora libreaz gozatzeko denborarik soberan izaten ez duen arren, “Kanela Hautsetan” bere txoko kuttunari eskaini ohi dion pasioa ez du alboratu nahi. Hori bai, bizitza biziz eta beste une batzuetan izan ez duen denbora libre horretaz gozatzen. Irudimen eta inspirazio horrek egiten baitu horren berezi gozogintzari eskainitako geure herriko txoko hau. Segi, bada, Zornotza zaporez betetzen eta gure zentzumen guztiak pizten!

LIMOIZKO GALLETA KRAKELATUAK

Osagaiak:


– 60 gr gurin bigundu
– 100 gr azukre
– Limoi baten birrindura
– 2 arrautza
– 4 koilarakada limoi-zuku
– 270 gr irin
– Legami koilarakada bat
– Koilarakada 1/2 gatz
– Galletak gainetik janzteko glace motako azukrea

Pausoz pauso…

  1. Irina eralki edota behatu + legamia eta gatza gehitu; ondoren, ondo nahastu, hagaxka baten laguntzarekin.
  2. Limoi-azala birrindu. Zuku-koilarakadak zukutu eta aldamenean utzi.
  3. Bol batean, bigundutako gurina + azukrea nahastu, krema bilakatu arte. Ondoren, birrindutako limoia eta limoi-zukua gehitu.
  4. Jarraian, arrautza gehitu, eta berriz ere, nahastu; masak edota oreak ebaki itxura hartu arte.
  5. Bukatze aldera, osagai sendoak gehitu eta espatula batekin nahastu.
  6. Erabilitako ontzia estali eta hozkailuan sartu, ordubetez.
  7. 35 gr bolatan banatu masa edota orea, 15 galleta inguru aterako direkarik, eta glace motako azukrez estali.
  8. Azkenik, sar itzazu galletak 180 gradutan aurretiaz berotutako labean eta manten itzazu, bertan, 15 minutuz. Gozatu!


+ Irakurri

‘ARGENTINA’ Irati Lezama

Iratik beti izan du argi psikologa izan nahi zuela. Horregatik, karrera Deustun eta Masterra Donostian egin ondoren, Buenos Airesera itzultzea erabaki zuen (aurretik han ikasten aritu baitzen), lanera eta batez ere bere formakuntza aberastera. Pozik etorri zen Erasmuseko hilabeteetan Argentinan

‘NORMANDIA’ Martín de la Cruz

Martín de La Cruz de Santiago nació en Normandía en 1924. Las cuentas se echan rápido, sí, cumplirá cien años en noviembre. “Si llego, claro”, me dice con una lucidez asombrosa para su edad. Bueno, ¡y para la mía! Idoia,

‘SAGARDOA’ Uxarte Sagardotegia

Jose Antonio Zamalloa “Txanpik”, baserritarra bezala aurkezteko esaten digu galdetzen diogunean.  Bizkaiko Sagardo Ekoizleen lehendakaria ere bada, sagardo ekoizlea, Uxarte sagardotegiaren jabea, sukaldaria.. eta, noski, baserritarra. Bere baserrira hurbildu gara, Montorra auzoan, Amorebieta Etxanon ekoizten den sagardoaren inguruan mintzatzera. Zein