● Errege Magoak 18:00ak aldera iritsiko dira herrira: Biarritz poligonoan hasiko dute ibilbidea, eta Gudari eta San Migel kaleak zeharkatuko dituzte Udaletxeko plazara iritsi aurretik.
Amorebieta-Etxanoko Udalak Ekialdeko Errege Magoen bisita iragarri du. Meltxor, Gaspar eta Baltasar bihar iluntzean sartuko dira, 18:00ak aldera, ilusioz eta magiaz betetako kabalgatan, Amorebieta-Etxanoko kaleak alaitasunez eta kolorez betez.
Hiru erregeek, karroza, paje eta laguntzaileekin batera, Biarritz industrialdean ekingo diote ibilbideari; eta Gudari eta San Migel kaleetan aurrera eginez Udaletxeko plazara iritsiko dira. Bertan, irrikaz itxaroten duten neska-mutilekin emozioz betetako topaketa egingo dute, beren gutunak emateko eta euren errege gogokoenekin une magiko bat partekatzeko.
Aurten, kabalgata Trollz gaia oinarri izango duen karroza animatu baten konpainiarekin iritsiko da, desfileari fantasiazko eta dibertimenduzko elementu bat gehituz. Horrez gain, trikitilarien musika eta Amorebieta-Etxanoko hip hop eskolako dantzarien dantzaldia ere izango dira.