• Instalazio hau Gure Kirolaken egongo da eta otsailaren amaieratik aurrera erabili ahal izango da
• Aurrekontu parte-hartzaileen bidez bizikletak garbitzeko leku ordenatu eta kontrolatu bat eskatzen zuten zornotzarrei erantzun nahi die honekin Amorebieta-Etxanoko Udalak
Amorebieta-Etxanoko Udalak hasi ditu herrian bizikletak garbitzeko jarriko den lehenengo lekua atontzeko lanak. Gure Kirolaken egongo da eta otsailaren amaieratik aurrera erabili ahal izango da.
Udalak horrela erantzuten dio zornotzarrek aurrekontu parte-hartzaileetan egindako eskari bati. Herritarrek bizikletak modu ordenatu eta kontrolatuan garbitzeko leku baten beharrizana aipatzen zuten aurrekontu parte-hartzaileetan. Zerbitzu hau oso erabilgarria izango da mendian bizikletan ibili ondoren euren bizikleta garbitu nahi dutenentzat.
Bizikletak garbitzeko bakarrik erabili ahal izango da leku hau. Instalazio hau eraikitzeko lanek hilabete eta erdi iraungo dute eta aurrekontua 25.000 eurokoa da.
