Amorebieta-Etxanoko liburutegiak online burutuko den familientzako programa berri bat jarriko du martxan HIRUTAN BI. Badaukagu zer kontatu lelopean.
Hiru emanaldietan, herriko diziplina desberdinetako bi artista bilduko ditu ipuin bat kontatzeko. Bikote bakoitzean batek ipuina kontatu eta besteak musikatuko du. Kontatuko diren ipuinak Amorebieta-Etxanon dagoen Ibaizabal argitaletxeak argitaratutakoak dira.
Lehenengo saioa azaroaren 14ean izango da, eta ipuina Unai Ormaetxeak aurkeztuko du, Inun abeslariaren laguntzarekin. Saio honetan aukeratutako ipuina “Azken Otsoa” izango da. Hurrengo emanaldiak, azaroaren 28an eta abenduaren 12an izango dira, eta saio hoietan ipuinak kontatuko dituzten bikoteak, Miren Larrea eta Fran Lasuen, eta Kittu taldeko bi partaidek osatuko dituzte.
Bideoak Amorebieta-Etxanoko kultura eta kirol saileko YouTube kanalean egongo dira. Edozein momentutan ikusteko aukera egongo da. Bertako artistak sortutako edukiak etxean ikusteko aukera ematen die Amorebieta-Etxanoko familiei.
