KENOPHOBIA dantza piezaren bira nazionalaren baitan, abenduaren 10ean Zornotzan izango da Zornotza Aretoan.
Fobien arloan, kanpoko egoerekiko beldurra sortarazten dutenak daude; hauen aurrean ezin da inongo kontrolik eduki. Hori da kenofobiaren kasua, espazio hutsekiko beldurra. Kenofobia duten pertsonentzako, espazio hutsak beldurgarriak dira; larritasun guztiz kontrolaezina sentitzen dute, bai espazio hutsetan daudenean, baita haietan pentsatzen dutenean ere. Sintoma emozionalen artean haserrea, beldurra, tristezia edo erruaren sentimendua daude. Espazio irekia hutsunearekin eta bakardadearekin lotzen dute; fobia honek bakardadearekiko beldurrarekin erlazio zuzena du.
Hiru dantzarik osaturiko dantza pieza koloretsu hau, festa batekin hasten da; berehala ospakizunaren amaiera iritsiko da eta jendea joan egingo da, espazioa zeharo hutsik geratu arte. Hutsunea gonbidatuen hezurretaraino sartuko da, bakardadea eta beldurra sortuz. Bakardade honetatik abiatuz, pertsonaia bakoitzaren ezegonkortasun emozionala islatuko da; dantzari bakoitzaren ahulezia eta beldurrak ikusiko dira. Beldur hauek erabat gaindituko dituzte, amaieran publiko aurrean ospatuz.
